កំពង់ស្ពឺ៖ព្រឹកថ្ងៃទី០១ ខែមិថុនា ឆ្នាំ២០២៤ ពិធីប្រារព្ធខួបលើកទី៧៥ នៃទិវាកុមារអន្តរជាតិ ០១ មិថុនា ឆ្នាំ២០២៤ ក្រោមអធិបតីភាពឯកឧត្តម ឯកឧត្តម វ៉ី សំណាង អភិបាល នៃគណ:អភិបាលខេត្តកំពង់ស្ពឺ ព្រមទាំងមានការអញ្ជើញចូលរួមពី លោក លោកស្រី ប្រធានមន្ទីរអង្គភាពជុំវិញខេត្ត កងម្លាំងទាំង៣ លោកគ្រូ អ្នកគ្រូ និងសិស្សានុសិស្ស សរុបប្រមាណជា ២៥០នាក់ ពិធីនេះដែរប្រារព្ធធ្វើនៅសាលប្រជុំបណ្ណាល័យកំពង់ស្ពឺ។
លោកស្រី ចែ ផល្លី អនុប្រធានមន្ទីរអប់រំយុជន និងកីឡាខេត្តកំពង់ស្ពឺ មានមតិស្វាគមន៍ និងអានរបាយការណ៍សង្ខេប និងជម្រាបជូននូវស្ថានភាពអប់រំក្នុងខេត្តកំពង់ស្ពឺរួចមក ។
ឯកឧត្តម វ៉ី សំណាង អភិបាល នៃគណ:អភិបាលខេត្តកំពង់ស្ពឺ បានបញ្ជាក់ពីមនោសញ្ចេតនាប្រកបដោយសុទិដ្ឋិនិយមគាំទ្រ និងលើកកម្ពស់សិទ្ធិកុមារជាមូលដ្ឋាន ព្រមទាំងយកចិត្ត ទុកដាក់ចំពោះកុមារ ជាពិសេសធ្វើឱ្យកុមារកាន់តែមានភាពកក់ក្តៅក្នុងការខិតខំរៀនសូត្រ ធ្វើឱ្យពួកគេមានសមត្ថភាព វិជ្ជាសម្បទា បំណិនសម្បទា និងចរិយាសម្បទា ជាមនុស្ស ពោរពេញដោយតម្លៃ និងសេចក្តីថ្លៃថ្នូរ មានទំនុកចិត្ត លើខ្លួនឯង អាចដោះស្រាយបញ្ហា ចេះសម្រេចចិត្ត ទទួលបានជោគជ័យក្នុងជីវិតនាពេលអនាគត និងប្រែក្លាយទៅជាពលរដ្ឋល្អ ជាកម្លាំងចលករដ៏សំខាន់សម្រាប់ថែរក្សាសន្តិភាព សុខដុមនីយកម្ម និងការអភិវឌ្ឍប្រទេសជាតិលើ គ្រប់វិស័យ។ រាជរដ្ឋាភិបាលអាណត្តិទី៧ ក្រោមការដឹកនាំរបស់ សម្តេចមហាបវរធិបតី ហ៊ុន ម៉ាណែត ជាប្រមុខដឹកនាំ បានផ្ដល់អាទិភាព ចំពោះការអភិវឌ្ឍធនធានមនុស្ស ជាអាទិភាពចម្បងក្នុងចំណោមវិស័យអាទិភាពទាំង៥ ដើម្បីសម្រេចទៅតាមផែនការយុទ្ធសាស្ត្រជាអាទិភាព ការអភិវឌ្ឍធនធានមនុស្ស រាជរដ្ឋាភិបាល បានដាក់ចេញនូវ សកម្មភាពដូចខាងក្រោម៖ ការពង្រឹងគុណភាព វិស័យអប់រំកីឡា វិទ្យាសាស្ត្រ និងបច្ចេកវិទ្យា ការបណ្តុះបណ្តាលជំនាញបច្ចេកទេស ការលើកកម្ពស់សុខភាសុខុមាលភាពប្រជាជន និងការពង្រឹងប្រព័ន្ធគាំពារសង្គម និងប្រព័ន្ធស្បៀង ។
ក្មួយៗគ្រប់រូបគួរចងចាំថា ជោគវាសនារបស់ព្រះរាជាណាចក្រកម្ពុជា មាតុភូមិដ៏ស្រស់ត្រកាល និងគួរឱ្យ ស្រឡាញ់ របស់យើង គឺស្ថិតនៅលើដៃរបស់ក្មួយៗគ្រប់រូប ហេតុនេះកាតព្វកិច្ចដ៏សំខាន់របស់យើងគឺ ការខិតខំរៀនសូត្រ ឱ្យបានពូកែ ដើម្បីក្លាយខ្លួនជា “កូនល្អ សិស្សល្អ មិត្តល្អ” និងក្លាយជាពលរដ្ឋល្អ ជាសសរទ្រូងរបស់ប្រទេស ជាកម្លាំងចលករសម្រាប់អភិវឌ្ឍជាតិ ហើយផ្សព្វផ្សាយសក្តានុពលជាតិយើង ទៅកាន់សកលលោក។
ឯកឧត្តមបានបន្កែមទៀតថា ការធ្វើពិធីរំលឹកខួប១មិថុនា ទិវាកុមារអន្តរជាតិ និងកុមារកម្ពុជាគឺដើម្បីឱ្យកុមារទទួលបាននូវសិទ្ធិកុមារភាពមួយ ប្រកបដោយសុភមង្គល ហើយនឹងប្រើប្រាស់នូវសិទ្ធិសេរីភាពទាំងឡាយដែលមានចែងនៅក្នុង សេចក្តីថែ្លងការណ៍អនុសញ្ញាអន្តរជាតិស្តីពី សិទ្ធិកុមារ និងដើម្បីជាគុណប្រយោជន៍សម្រាប់ផ្ទាល់ខ្លួនសម្រាប់សង្គម ព្រមទាំងសូមអំពាវនាវដល់មាតា បិតា បុរស ស្ត្រី ដែលជាបុគ្គលគ្រប់ៗរូប និងអង្គការស្មគ្រ័ចិត្ត អាជ្ញាធរមូលដ្ឋានគ្រប់ជាន់ថា្នក់ សូមឱ្យទទួលស្គាល់នូវសិទ្ធិកុមារទាំងនេះ ធ្វើការគោរពសិទ្ធិដល់កុមារគ្រប់ៗគ្នា ឯកឧត្តមសូមអំពាវនាវដល់ក្មួយៗ សិស្សានុសិស្សនៅទីនេះទាំងអស់ ក៏ដូចជាក្មួយៗនៅទូទាំងខេត្តសូមអោយក្មួយៗក្រោកឈរឡើងរួមដៃគ្នាជាកំលាំងសាមគ្គីឱ្យបានរឹងមាំ តស៊ូដើម្បី សិទ្ធិសេរីភាពនិងសន្តិភាពទូទាំងសកលលោក ហើយប្រឆាំងដាច់ខាតនូវរាល់អំពើឧក្រិដ្ឋកម្មឃោរឃៅ និងការរំលោភបំពានគ្រប់រូបភាពមកលើក្មួយៗកុមារផងដែរ។
