ខេត្តកំពង់ស្ពឺ៖ នៅព្រឹកថ្ងៃទី៦ ខែឆ្នូ ឆ្នាំ២០២៤ លោក ស្រីឡាវ ស៊ីថុលអភិបាលរង ហើយគណៈអភិបាលស្រុកភ្នំស្រួចតំណាងដ៏ខ្ពង់ខ្ពស់លោកអភិបាលនៃគណៈអភិបាលស្រុកអញ្ជើញជាអធិបតីភាពក្នុងកិច្ចប្រជុំផ្សព្វផ្សាយស្តីពីការបិទផ្សាយទិន្នន័យជាសាធារណៈនូវឯកសារនៃការវិនិច្ឆ័យសម្រាប់ការចុះបញ្ជីដីធ្លីមានលក្ខណៈជាប្រព័ន្ធ ដែលរៀបចំដោយមន្ទីររៀបចំដែនដី នគររូបនីយកម្ម សំណង់ និងសុរិយោដីខេត្ត ស្ថិតឃុំយាយម៉ៅពេជ្រនិល ស្រុកភ្នំស្រួច ពិធីនេះមានការអញ្ជើញចូលរួមពីសំណាក់ លោក តំណាងមន្ទីររៀបចំដែនដីនគររូបនីយកម្មសំណង់និងសុរិយោដីខេត្ត តំណាងមន្ទីរពាក់ព័ន្ធខេត្តលោក តំណាងការិយាល័យ រៀបចំដែនដីសំណង់និងភូមិបាល រៀបចំដែដីនិងសំណង់ ក្រុង ព្រមទាំងមន្ត្រី ការិយាល័យជុំវិញស្រុក កងកម្លាំងទាំងបីអជ្ញាធរពាក់ព័ន្ធ គណៈកម្មការរដ្ឋបាល ប្រជាពលរដ្ឋនិងព្រឹទ្ធាចារ្យសរុបប្រមាណជាង២០០នាក់។
លោក ម៉ី សំអឿន អនុប្រធានការិយាល័យរៀបចំដែនដីនគររូបនីយកម្មស្រុកភ្នំស្រួច បានបញ្ជាក់ថាថ្ងៃនេះប្រជុំផ្សព្វផ្សាយសេចក្តីប្រកាសបិទ ផ្សាយទិន្នន័យជាសាធារណៈនូវឯកសារការវិនិច្ឆ័យនៅ យាយម៉ៅពេជ្រនិល ស្រុកភ្នំស្រួចមានចំនួន២ភូមិ រួមមានក្បាលដីចំនួនសរុប១ ១២៥។
លោកបានថ្លែងថា÷ការចុះបញ្ជីដីធ្លីមានលក្ខណៈជាប្រព័ន្ធអនុវត្តតាមនីតិវិធីដែលបានកំណត់ ដោយច្បាប់ និងបច្ចេកវិទ្យាទំនើបមានតម្លាភាព និងការទទួលខុសត្រូវ ដែលប្រទេសជឿនលឿនលើពិភពលោកកំពុងអនុវត្តនិងមានប្រសិទ្ធិភាពលើការគ្រប់គ្រងដីធ្លី នេះជាការសមស្របបំផុតដែលបានកំណត់នៅក្នុងគោលនយោបាយដីធ្លីរបស់រាជរដ្ឋាភិបាល ដើម្បីលើកស្ទួយដល់ការអភិវឌ្ឍន៍របស់ប្រទេសជាតិ ជាប្រយោជន៍ប្រជាពលរដ្ឋជាម្ចាស់ដីផង គឺ រដ្ឋគ្រប់គ្រងដីធ្លីបានទាំងដីរដ្ឋ និងដីឯកជន ដែលធ្វើឱ្យរដ្ឋមានការងាយស្រួលក្នុងការរៀបចំដែនដីរដ្ឋបាលដីធ្លី ការបែងចែកដី និងកាត់បន្ថយទំនាស់ដីធ្លី ធានាសុវត្ថិភាពនៃការកាន់កាប់ដីធ្លីជូនប្រជាពលរដ្ឋ និងបម្រើដល់ការវិនិយោគទទួលបាននូវសិទ្ធិស្របច្បាប់ ក្លាយជាម្ចាស់ដីពិតប្រាកដ ដែលត្រូវបានការពារដោយច្បាប់ និងធានាដោយរដ្ឋ ដែលអាចធ្វើការបង្ករបង្កើនផល ឬប្រកបមុខរបរផ្សេងៗទៀតលើដីធ្លីរបស់ខ្លួនដោយគ្មានការព្រួយបារម្ភ អាចប្រើប្រាស់ប័ណ្ណកម្មសិទ្ធិ ដើម្បីផលប្រយោជន៍ផ្សេងៗក្នុងការប្រកបមុខរបរ និងអាជីវកម្ម។
បងឱកាសនេះផងដែរ លោកស្រី ឡាវ ស៊ីថុល លើកឡើងថាសូមឱ្យបងប្អូនប្រជាពលរដ្ឋដែលជាម្ចាស់ក្បាលដីមកពិនិត្យផ្ទៀងផ្ទាត់ក្បាលដីរបស់ខ្លួនរយៈពេល១៥ថ្ងៃ គឺគិតចាប់ពីថ្ងៃទី៦ ខែឆ្នូ រហូតដល់ថ្ងៃទី២១ ខែឆ្នូ ឆ្នាំ ២០២៤ ដើម្បីធានាបាននូវភាពសុក្រឹត្យត្រឹមត្រូវទាំងលក្ខណៈបច្ចេកទេស និងលក្ខណៈច្បាប់ ក្នុងកំឡុងពេលនៃការបិទផ្សាយនេះ ម្ចាស់ដី អ្នកកាន់កាប់ដី និងអ្នកពាក់ព័ន្ធអាចធ្វើការកែតំរូវ ឬដាក់ពាក្យបណ្តឹងជំទាស់តវ៉ាបាន ប្រសិនបើពិនិត្យទៅឃើញថា មានកំហុសឆ្គងដោយត្រូវដាក់ពាក្យស្នើសុំ ឬជំទាស់ចូលមកគណៈកម្មការរដ្ឋបាល មន្ត្រីដែលប្រចាំការនៅកន្លែងបិទផ្សាយ តាមរយ:អាជ្ញាធរភូមិ ឃុំ ហើយត្រូវបានធ្វើការសម្របសម្រួលតាមការព្រម ព្រៀងដោយគណៈកម្មការរដ្ឋបាលរៀង រាល់ម៉ោងធ្វើការ៕
