កំពង់ស្ពឺ÷ ឯកឧត្តម បណ្ឌិត ជាម ច័ន្ទសោភ័ណ ប្រធានគណៈកម្មាធិការ រណសិរ្សសាមគ្គី អភិវឌ្ឍន៍មាតុភូមិកម្ពុជាខេត្ត ឯកឧត្តម យឹម សុខុម អនុប្រធានគណៈកម្មាធិការ រណសិរ្សសាមគ្គី អភិវឌ្ឍន៍មាតុភូមិកម្ពុជាខេត្ត បានអញ្ជើញជាអធិបតីភាពក្នុងពិធីអបអរសាទរ ខួបអនុស្សាវរីយ៍ លើកទី៤៦ ទិវាកំណើត រណសិរ្សសាមគ្គី អភិវឌ្ឍន៍មាតុភូមិកម្ពុជា(២ ធ្នូ ១៩៧៨ – ២ ធ្នូ ២០២៤) ថ្ងៃសៅរ៍ ៧កើត ខែមិគសិរ ឆ្នាំរោង ឆស័ក ព.ស. ២៥៦៨ នៅបណ្ណាល័យខេត្តកំពង់ស្ពឺ ថ្ងៃទី ៧ ខែឆ្នូ ឆ្នាំ២០២៤។
ឯកឧត្តមបណ្ឌិត ជាម ច័ន្ទសោភ័ណ ប្រធានគណៈកម្មាធិការ រណសិរ្សសាមគ្គី អភិវឌ្ឍន៍មាតុភូមិកម្ពុជាខេត្ត បានអាន÷ សារលិខិតរបស់សម្តេចកិត្តិសង្គហបណ្ឌិត ម៉ែន សំអន ប្រធានក្រុមប្រឹក្សាជាតិរណសិរ្សសាមគ្គី អភិវឌ្ឍន៍មាតុភូមិកម្ពុជា និងជាឧត្តមប្រឹក្សាផ្ទាល់ព្រះមហាក្សត្រ។ ហើយឯកឧត្តមបណ្ឌិតមានប្រសាសន៍ នៅក្នុងទិវារណសិរ្សសាមគ្គី អភិវឌ្ឍន៍មាតុភូមិកម្ពុជាលើកទី៤៦នោះថា ឯកឧត្តម ជាយុវជនសម័យនោះ បានហែលឆ្លងការលំបាកជាច្រើន រួមទាំងការឆ្លងកាត់ការទម្លាក់គ្រាប់បែកពីអាកាស គ្រាប់រថក្រោះ និងគ្រាប់ បែកគ្រប់ធុនពោលគឺយុវជនសម័យនោះ ត្រូវផ្សងគ្រោះថ្នាក់ដល់អាយុជីវិតគ្រប់វិនាទី។ ក្រុមគ្រួសារត្រូវបាននិរាស្តព្រាត់ប្រាស់ដោយការកាប់សម្លាប់ទាំងគ្មានកំហុស ហើយ បង្ខំឱ្យធ្វើការលើសកម្លាំង ឱ្យហូបមិនឆ្អែត ឈឺគ្មានថ្នាំសង្កូវព្យាបាល។ក្រោមការតាំងចិត្ត និងមានឆន្ទៈខ្ពស់បំផុត ដើម្បីប្រជាជននិងប្រទេសជាតិ បានធ្វើឱ្យមានការតស៊ូប្រមូលកម្លាំងមហាជន ហើយឈានដល់ការចាប់ផ្តើមផ្តួលរំលំរបបប្រល័យពូជសាសន៍ប៉ុលពតនៅថ្ងៃទី២ធ្នូ ឆ្នាំ១៩៧៨ និងបានរំដោះនៅថ្ងៃទី៧ មករា ឆ្នាំ១៩៧៩។
ក្នុងឱកាសនោះ ឯកឧត្តមក៏បានរំឭកដោយគូសបញ្ជាក់បន្ថែមថា ជាការពិត កម្ពុជាពិតជាត្រូវការសន្តិភាព ហើយការថែរក្សាសន្តិភាពគឺជាកាតព្វកិច្ចនៃប្រជាពលរដ្ឋគ្រប់រូប ពិសេសគឺយុវជនកម្ពុជាទាំងមូលត្រូវបន្តការការពារនូវរាល់សមិទ្ធិផល និងស្នាដៃធំៗរបស់ប្រមុខរាជរដ្ឋាភិបាលអតីត និងបច្ចុប្បន្ន នឹងត្រូវបន្តរួមគ្នាក្នុងការអភិវឌ្ឍន៍សមិទ្ធិផលថ្មីៗបន្ថែមទៀតសម្រាប់ប្រជាជន និងប្រទេសជាតិយើងទាំងមូល។
យុវជនតំណាងអង្គនិទ្ទិញក៏បានធ្វើការចំណាប់អារម្មណ៍ថា÷ យើងខ្ញុំទាំងអស់គ្នាចងចាំជានិច្ចនូវគុណបំណាច់របស់ «រណសិរ្សសាមគ្គីសង្គ្រោះជាតិកម្ពុជា» ដែលបច្ចុប្បន្ន មានឈ្មោះថា «រណសិរ្សសាមគ្គី អភិវឌ្ឍន៍មាតុភូមិកម្ពុជា» ដឹកនាំដោយ សម្តេចអគ្គមហាពញា ចក្រី ហេង សំរិន, សម្តេចអគ្គមហាធម្មពោធិសាល ជា ស៊ីម, សម្តេចអគ្គមហាសេនាបតីតេជោ ហ៊ុន សែន និងថ្នាក់ដឹកនាំដទៃទៀត គឺជាបុព្វការីដ៏មានគុណបំផុតរបស់យើងខ្ញុំ ព្រោះថារណសិរ្សនេះហើយ ដែលនាំមកនូវមហាជ័យជម្នះ ៧មករា ដែលបានសង្គ្រោះជីវិតប្រជាជនកម្ពុជាឱ្យរួចផុតពីសេចក្តីស្លាប់ និង បានរស់នៅក្នុងកិត្តិយស សេចក្តីថ្លៃថ្នូរ សុខសន្តិភាព រីកចម្រើន សម្បូរសប្បាយ និងសិទ្ធិសេរីភាពយ៉ាងទូលំ ទូលាយ ប្រកបដោយសេចក្តីសង្ឃឹម និងភាពញញឹមស្រស់ស្រាយគ្រប់ពេល និងគ្រប់ទីកន្លែង។ យើងខ្ញុំសូម ចាត់ទុកអគ្គស្ថាបនិកអង្គការរណសិរ្សនេះ ជាអ្នកមានគុណ ជាវីរជនអ្នកស្នេហាជាតិយ៉ាងពិតប្រាកដ ព្រោះថា មានតែអគ្គស្ថាបនិក និងអង្គការរណសិរ្ស នេះតែមួយគត់ ដែលបានក្រោកឈរ ពីក្នុងស្ថានភាពដ៏លំបាក លំបិនបំផុត ប្រមូលផ្តុំកម្លាំងសាមគ្គីគ្រប់ទិសទី ដឹកនាំការតស៊ូរំដោះជាតិ មាតុភូមិ និងប្រជាជនឱ្យបានរស់ រានមានជីវិត រួចផុតពីគ្រោះមហន្តរាយប្រល័យពូជសាសន៍ និងជាស្នូលដឹកនាំក្នុងការការពារ ស្តារ កសាង មាតុភូមិពីគំនរផេះផង់ជាជំហានៗ ឆ្ពោះមកកាន់ភាពសម្បូររុងរឿង សុខដុមរមនា នាពេលនេះ និងទៅអនាគត។
នឹកឃើញការដែលរួចផុតពីសេចក្តីស្លាប់ និងបាន រស់រានមានជីវិត ក្នុងភាពសម្បូរសប្បាយ មានសិទ្ធិសេរីភាពគ្រប់បែបយ៉ាង យើងខ្ញុំនឹកឃើញភ្លាមដល់អ្នក មានគុណ ដែលបានសង្គ្រោះជីវិត ស្របនឹងសុភាសិត «បានហូបទឹក មិនភ្លេចប្រភពទឹក» ។ ថ្ងៃ២ធ្នូ គឺជាទិវាប្រវត្តិសាស្ត្ររបស់ជាតិយើង។ យើងខ្ញុំ និងកូនចៅជំនាន់ក្រោយយល់ច្បាស់ថា
បើគ្មានថ្ងៃ២ធ្នូ និងថ្ងៃជ័យជម្នះ៧មករាទេ យើងគ្មានអ្វីៗទាំងអស់ដូចសព្វថ្ងៃនេះទេ។ នេះជាសច្ចធម៌ប្រវត្តិ សាស្ត្រ ដែលមិនអាចបុគ្គលណាបដិសេធបានឡើយ។ ខួបអនុស្សាវរីយ៍ លើកទី៤៦ នៃ « ទិវាកំណើតរណសិរ្សសាមគ្គី អភិវឌ្ឍន៍មាតុភូមិកម្ពុជា» នៅឆ្នាំនេះ ប្រារព្ធឡើងក្នុងសភាពការណ៍ស្របពេលដែលព្រះរាជាណាចក្រកម្ពុជាសម្រេចបានសមិទ្ធផលធំៗថ្មីជា ច្រើនលើគ្រប់វិស័យ ក្រោមការដឹកនាំរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះ រាជាណាចក្រកម្ពុជា បន្តអភិវឌ្ឍប្រទេសជាតិឈានទៅមុខ ប្រកបដោយភាពជឿជាក់ខ្ពស់ លើមាគ៌ាសន្តិភាព ប្រជាធិបតេយ្យ និងអភិវឌ្ឍន៍ ជាមួយការលេចត្រដែតឡើងនូវកិត្យានុភាពរបស់កម្ពុជាលើឆាកអន្តរជាតិ។ដើម្បីជាសក្ខីភាពនៃការដឹងគុណចំពោះបុព្វការី និងរណសិរ្សសាមគ្គី អភិវឌ្ឍន៍មាតុភូមិកម្ពុជា ទូលព្រះបង្គំ ខ្ញុំព្រះករុណា យើងខ្ញុំ សូមធ្វើសច្ចា និងប្តេជ្ញាចិត្តដូចតទៅ៖
១- ប្តេជ្ញា ចងចាំជានិច្ច ដោយចាត់ទុក រណសិរ្ស២ធ្នូ គឺជាបុព្វការីដ៏មានគុណបំផុតរបស់ យើងទាំង អស់គ្នា។
២- ប្តេជ្ញា រួមរស់អនុវត្តតាមគោលនយោបាយរបស់រាជរដ្ឋាភិ បាល និងរណសិរ្ស ដើម្បីបន្តថែរក្សា ការពារសុខសន្តិភាព និងការអភិ វឌ្ឍន៍ របស់សង្គមជាតិ។
៣- ប្តេជ្ញា រក្សាឧត្តមគតិស្នេហាជាតិ និងការបង្រួបបង្រួមជាតិរបស់អគ្គស្ថាបនិករណសិរ្ស២ធ្នូ។
៤- ប្តេជ្ញា ជំរុញបង្កើនសមាជិក សមាជិការណសិរ្ស និងបំផុសចលនាមហាជនឱ្យគាំទ្ររាជរដ្ឋា ភិបាល។
៥- ប្តេជ្ញា លើកកម្ពស់ស្មារតីថែរក្សាសុខសន្តិភាព សាមគ្គីភាព ប្រកាន់ខ្ជាប់ប្រពៃណីស្នេហាជាតិ ផ្សាភ្ជាប់ជាមួយប្រជាជន បម្រើប្រជាជនឱ្យអស់កំលាំងកាយចិត្ត។
៦- ប្តេជ្ញា បំផុសចលនាសមាជិក សមាជិការណសិរ្ស ទប់ស្កាត់ឱ្យបានដាច់ខាតនូវរាល់សកម្មភាព ទាំងឡាយ ដែលនាំឱ្យបាត់បង់សុខសន្តិភាព និងការអភិវឌ្ឍ។
៧- ប្តេជ្ញា ពង្រឹង និងពង្រីកទំនាក់ទំនងសាមគ្គីភាព មិត្តភាព និងសហប្រតិបត្តិការល្អ ជាមួយបណ្តា ប្រទេសជាមិត្តទាំងក្នុងតំបន់ និងសកលលោក។
៨- ប្តេជ្ញា គាំទ្រ និងរួមចំណែកក្នុងការអនុវត្តកម្មវិធីនយោបាយ និងយុទ្ធសាស្ត្របញ្ចកោណ ដំណាក់ កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភា ដែលមាន សម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី នៃព្រះរាជាណាចក្រកម្ពុជា៕
