កំពង់ស្ពឺ៖ព្រឹកថ្ងៃទី២៦ ខែឧសភា ឆ្នាំ២០២៥ កិច្ចប្រជុំវិសាមញ្ញលើកទី ០៧ អាណត្តិទី ៤ របស់ក្រុមប្រឹក្សាខេត្ត ក្រោមអធិបតីភាពឯកឧត្តម យឹម សុខុម ប្រធានក្រុមប្រឹក្សាខេត្ត ឯកឧត្តម ជាម ច័ន្ទសោភ័ណ អភិបាល នៃគណៈអភិបាលខេត្តកំពង់ស្ពឺ ព្រមទាំងមានការអញ្ជើញចូលរួមពី ឯកឧត្តម លោកជំទាវ សមាជិកក្រុមប្រឹក្សាខេត្ត លោក លោកស្រីប្រធានមន្ទីរអង្គភាពជុំវិញខេត្ត កងកម្លាំងទាំង៣ អង្គភាពចំណុះសាលាខេត្ត និងអភិបាលក្រុង ស្រុក ទាំង៩ ពិធីដែរប្រារព្ធធ្វើនៅសាលប្រជុំសាលាខេត្ត យឹម សុខុម ។
ឆ្លៀតក្នុងឱកាសនោះដែរ ឯកឧត្តម យឹម សុខុម ប្រធានក្រុមប្រឹក្សាខេត្ត បាបមានមតិស្វាគមន៍ និងបើកអង្គប្រជុំ វិសាមញ្ញលើកទី ០៧ អាណត្តិទី ៤ របស់ក្រុមប្រឹក្សាខេ ខេត្ត និងពិនិត្យមាសភាពចូលរួមរួចមក ឯកឧត្តម
បានការណែនាំអំពីបច្ចេកទេសនៃការរៀបចំ និងកសាងផែនការអភិវឌ្ឍន៍រយៈពេលប្រាំឆ្នាំ និងច្បាប់ស្តីពីការគ្រប់គ្រងរដ្ឋបាលរាជ ធានី ខេត្ត ក្រុង ស្រុក ខណ្ឌ និងច្បាប់ ស្តីពីការគ្រប់គ្រង រដ្ឋបាលឃុំ សង្កាត់ បានតម្រូវឲ្យក្រុមប្រឹក្សា នៃរដ្ឋបាល ថ្នាក់ក្រោមជាតិនីមួយៗ រៀបចំកសាងផែនការអភិវឌ្ឍន៍រយៈពេលប្រាំឆ្នាំ ដោយមានការចូលរួម ពីគ្រប់ភាគីពាក់ព័ន្ធ នានា ។ ផែនការអភិវឌ្ឍន៍រយៈពេលប្រាំឆ្នាំ គឺជាមធ្យោបាយយ៉ាងសំខាន់របស់រដ្ឋបាលថ្នាក់ក្រោមជាតិ ដែលត្រូវ ប្រើប្រាស់សម្រាប់កំណត់អំពីបញ្ហា និងតម្រូវការជាអាទិភាពយ៉ាងពិតប្រាកដរបស់មូលដ្ឋាន និងយុទ្ធសាស្ត្រនានា ដើម្បីដោះស្រាយបញ្ហាប្រឈមទាំងនោះ សំដៅឆ្លើយតបនឹងតម្រូវការជាអាទិភាព របស់ប្រជាពលរដ្ឋយ៉ាងមាន ប្រសិទ្ធភាព។
ឯកឧត្តបានបន្តទៀតថា យោងតាមលិខិតបទដ្ឋានគតិយុត្តសំខាន់ៗនានារបស់ផែនការអភិវឌ្ឍន៍ខេត្ត ជាផែនការ ដែលមានការសម្របសម្រួលរវាងផែនការខេត្តជាមួយផែនការក្រុង ស្រុក និងឃុំ សង្កាត់ក្នុងខេត្ត និងជាផែនការដែលត្រូវបំពេញបន្ថែម និងគាំទ្រដល់ផែនការក្រុង ស្រុក និងឃុំ សង្កាត់ក្នុងខេត្តនោះ សំដៅបង្កើនប្រសិទ្ធភាពនៃការឆ្លើយតបទៅនឹងតម្រូវការអភិវឌ្ឍន៍នៅមូលដ្ឋាន។ ផែនការ អភិវឌ្ឍន៍ខេត្ត មិនមែនជាផែនការដែលកើតចេញពីការបូកបញ្ចូលគ្នានូវផែនការអភិវឌ្ឍន៍ ក្រុង ស្រុក និងឃុំ សង្កាត់ទាំងអស់ក្នុងខេត្តនោះឡើយ។ ការពិគ្រោះយោបល់ និងការចូលរួមរបស់ប្រជាពលរដ្ឋ វិស័យឯកជន សង្គមស៊ីវិល និងអ្នកពាក់ព័ន្ធនានា គឺជាគោលការណ៍សំខាន់ និងចាំបាច់ នៅក្នុងដំណើរការកសាងផែនការ អភិវឌ្ឍន៍ខេត្ត។
ក្នុងឱកាសនោះដែរ ឯកឧត្តម ជាម ច័ន្ទសោភ័ណ អភិបាលខេត្ត មានប្រសាសន៍ថា ការរៀបចំកសាងផែនការអភិវឌ្ឍន៍ខេត្តគឺឆ្លុះបញ្ចាំងអំពីផែនការអភិវឌ្ឍន៍ រយៈពេលប្រាំឆ្នាំសម្រាប់អាណត្តិរបស់ក្រុមប្រឹក្សា និង កម្មវិធីអភិវឌ្ឍន៍មូលដ្ឋានរយៈពេលប្រាំឆ្នាំ ផែនការ អភិវឌ្ឍន៍រយៈពេលប្រាំឆ្នាំសម្រាប់អាណត្តិរបស់ក្រុមប្រឹក្សា ជាផែនការដែលមានចរិតជាទស្សនៈអភិវឌ្ឍន៍រួម របស់រដ្ឋបាលថ្នាក់ក្រោមជាតិ ដោយរួមបញ្ចូលនូវគោលដៅអភិវឌ្ឍន៍របស់ក្រសួង ស្ថាប័ន ឬអង្គភាពនានារបស់ រាជរដ្ឋាភិបាល សង្គមស៊ីវិល និងវិស័យឯកជន ដែលបានផ្តល់សេវា សម្ភារៈ ឬហេដ្ឋារចនាសម្ព័ន្ធដោយផ្ទាល់នៅ ក្នុងដែនសមត្ថកិច្ចរបស់ក្រុមប្រឹក្សានៃរដ្ឋបាលថ្នាក់ក្រោមជាតិនោះ កម្មវិធីអភិវឌ្ឍន៍មូលដ្ឋានរយៈពេលប្រាំឆ្នាំដា របៀបវារៈ ឬកម្មវិធីជាក់ស្តែង ដែលរដ្ឋបាលថ្នាក់ក្រោមជាតិនីមួយៗចង់សម្រេចបានក្នុងអាណត្តិរបស់ខ្លួន សម្រាប់បង្ហាញពីគណនេយ្យភាពរបស់ខ្លួនចំពោះប្រជាពលរដ្ឋ និងចំពោះរាជរដ្ឋាភិបាល ។
ឯកឧត្តមបានបន្តទៀតថា យោងតាមប្រតិទិនការងារសម្រាប់ដំណើរការកសាងផែនការអភិវឌ្ឍន៍រយៈពេលប្រាំឆ្នាំ (២០២៥-២០២៥) ដំណើរប្រព្រឹត្តទៅនៃការរៀបចំ និងកសាងផែនការក្រុមការងារកសាងផែនការថ្នាក់ខេត្ត បានសម្របសម្រួលរៀបចំកិច្ចប្រជុំផ្សព្វផ្សាយ អំពីការរៀបចំផែនការ អភិវឌ្ឍន៍រយៈពេលប្រាំឆ្នាំ ដើម្បីប្រមូលធាតុចូលអំពីការវិភាគស្ថានភាព និងការស្នើគម្រោង សកម្មភាពនៅតាម រដ្ឋបាលខេត្ត ក្រុង ស្រុក ឃុំ សង្កាត់ មន្ទីរ អង្គភាពជុំវិញខេត្ត អង្គការសង្គមស៊ីវិល និងសប្បុរសជននានា ដើម្បីជាមូលដ្ឋានសម្រាប់រៀបចំផែនការក្នុងគោលបំណង ឆ្លើយតបទៅនឹងតម្រូវការជាក់ស្តែងរបស់ប្រជាពលរដ្ឋនៅថ្នាក់ មូលដ្ឋាន ដោយក្នុងនោះក្រុមការងារបានរៀបចំប្រជុំផ្សព្វផ្សាយ អំពីការបំពេញទម្រង់ពាក់ព័ន្ធនានាដល់រដ្ឋបា លខេត្ត ក្រុង ស្រុក ឃុំ សង្កាត់ មន្ទីរ អង្គភាពជុំវិញខេត្ត អង្គការសង្គមស៊ីវិល និងសប្បុរសជននានាផងដែរ ។
