កំពង់ស្ពឺ៖ ថ្ងៃទី២៥ ខែមីនា ឆ្នាំ២០២៥–ឯកឧត្តម អ៉ឹម សិទ្ធីរ៉ា ប្រតិភូរាជរដ្ឋាភិបាលទទួលបន្ទុកអគ្គនាយកនៃអគ្គនាយកដ្ឋានដោះស្រាយផលប៉ះពាល់ដោយសារគម្រោងអភិវឌ្ឍន៍ ឯកឧត្តមបណ្ឌិត ជាម ច័ន្ទសោភ័ណ អភិបាល នៃគណៈអភិបាលខេត្ត អញ្ជើញជាអធិបតីភាពក្នុងកិច្ចប្រជុំពិភាគ្សាលើការអនុវត្តការងារលើការដោះស្រាយផលប៉ះពាល់ដោយសារគម្រោងអភិវឌ្ឍន៍ក្នុងភូមិសាស្ត្រខេត្តកំពង់ស្ពឺ ក្រោមហិរញ្ញប្បទានធនាគារពិភពលោក។ និងមានការអញ្ចើញចូលរួមពីសំណាក់ ឯកឧត្តមអភិបាលងខេត្ត លោកនាយករដ្ឋបាលខេត្ត ប្រធានមន្ទីរជំនាញពាក់ព័ន្ធជាច្រើនរូប។
ក្រោយពីឯកឧត្តមបណ្ឌិត អភិបាលខេត្តថ្លែង សុន្ទរកថារួចមក ឯកឧត្តម អ៉ឹម សិទ្ធីរ៉ា បានមានប្រសាសន៍ថា ៖ខេត្តដែលទទួលបានការអភិវឌ្ឍន៍ច្រើនគឺទាមទារឱ្យមានការគ្រប់គ្រងឱ្យបានត្រឹមត្រូវនូវសំរាម សំណល់រឹងនិងប្លាស្ទិក ដើម្បីបញ្ចៀសនូវរាល់ផលប៉ះពាល់ដល់បរិស្ថាន អនាម័យ សុខភាពសាធារណៈ និងសោភ័ណ្ឌភាពទីក្រុង។
ឯកឧត្តម អ៉ឹម សិទ្ធីរ៉ា បានលើកឡើងថា ដោយសារកំណើនសេដ្ឋកិច្ចសង្គម និងតម្រូវការនគររូបនីយកម្មកើនឡើង បានធ្វើឱ្យបរិមាណសំរាម សំណល់រឹងនៅតាម ទីប្រជុំជននានាតាមបណ្តារាជធានី ខេត្តទូទាំងប្រទេស ពិសេសខេត្តកំពង់ស្ពឺមានការកើនឡើងនិងបង្កផលប៉ះពាល់ដល់បរិស្ថាន អនាម័យ សុខភាពសាធារណៈ និងសោភ័ណភាពទីក្រុង ទីប្រជុំជន។ហើយដើម្បីដោះស្រាយបញ្ហានេះ និងធានាឱ្យការគ្រប់គ្រងសំរាម សំណល់រឹងទីប្រជុំជនមានប្រសិទ្ធភាពខ្ពស់ រាជរដ្ឋាភិបាលបានសម្រេចផ្ទេរមុខងារគ្រប់គ្រងសំរាម សំណល់រឹងទីប្រជុំជននេះ មកឱ្យរដ្ឋបាលរាជធានី និងរដ្ឋបាលក្រុង ស្រុកដែលនៅកៀកជិតប្រជាពលរដ្ឋជាអ្នកអនុវត្ត តាមរយៈអនុក្រឹត្យលេខ១១៣ ដែលបានដាក់ចេញកាលពីឆ្នាំ២០១៥។
ទន្ទឹមនោះប្រតិភូរាជរដ្ឋាភិបាលទទួលបន្ទុកក៏បានគូសបញ្ជាក់បន្ថែមថា រាជរដ្ឋាភិបាលកម្ពុជានីតិកាលទី៦នៃរដ្ឋសភាបានដាក់ចេញគោលនយោបាយស្តីពីការគ្រប់គ្រងសំរាម សំណល់រឹងទីប្រជុំជនដើម្បីធានាថា ចាប់ពីឆ្នាំ២០៣០ខាងមុខ សំរាម សំណល់រឹងទីប្រជុំជនគ្រប់ប្រភេទនឹងត្រូវបានញែក វេចខ្ចប់ ទុកដាក់ សំអាត ប្រមូល ដឹកជញ្ជូន ប្រើប្រាស់និងកែច្នៃ ព្រមទាំងធ្វើប្រព្រឹត្តិកម្មតាមបច្ចេកវិទ្យាប្រកបដោយអនាម័យ និងសុវត្ថិភាពបរិស្ថាន។
ឯកឧត្តមបន្ដថា សម្រាប់នីតិកាលទី៧នេះ រាជរដ្ឋាភិបាលបានដាក់ចេញនូវយុទ្ធសាស្ត្របញ្ចកោណដំណាក់កាលទី១ ដោយបន្តចាត់ទុកការកែលម្អគុណភាព និងប្រសិទ្ធភាពនៃការផ្ដល់សេវាជូនប្រជាពលរដ្ឋ ជាការងារអាទិភាពមួយដែលត្រូវសម្រេចឱ្យបាន។ បញ្ចកោណទី៤ ផ្តោតលើការអភិវឌ្ឍប្រកបដោយចីរភាព និងបរិយាប័ន្ន ដែលក្នុងនោះ ការធានាចីរភាពបរិស្ថាន និងការរៀបចំខ្លួន ដើម្បីឆ្លើយតបនឹងការប្រែប្រួលអាកាសធាតុ ព្រមទាំងការលើកកម្ពស់សេដ្ឋកិច្ចបៃតង គឺជាកិច្ចការអាទិភាពរបស់រាជរដ្ឋាភិបាលកម្ពុជា។
ស្របគ្នានេះ កម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិដំណាក់កាលទី២ បានកំណត់ថា ការគ្រប់គ្រងសំរាម សំណល់រឹងទីប្រជុំជននៅរដ្ឋបាលថ្នាក់ក្រោមជាតិ គឺជាការអនុវត្តមុខងារជាកាតព្វកិច្ចមួយដែលបានកំណត់នៅក្នុងសមាសភាគទី៥ ដោយផ្តោតលើការលើកកម្ពស់ការផ្តល់សេវាសាធារណៈ និងការអភិវឌ្ឍសេដ្ឋកិច្ចមូលដ្ឋាន។ផ្អែកលើក្របខណ្ឌគោលនយោបាយខាងលើនេះ ក្រសួងមហាផ្ទៃ បានសហការជាមួយក្រសួងសាធារណការ និងដឹកជញ្ជូន ក្រសួងបរិស្ថាន និងក្រុមការងារធនាគារពិភពលោកបានធ្វើការសិក្សាលើគម្រោងធ្វើឱ្យប្រសើរឡើងនៃការគ្រប់គ្រងសំរាម សំណល់រឹង និងសំណល់ប្លាស្ទិកនៅប្រទេសកម្ពុជា ក្រោមក្របខណ្ឌហិរញ្ញប្បទានពីធនាគារពិភពលោក ដែលមានទឹកប្រាក់ ៦៧.៣លានដុល្លារ សម្រាប់រយៈពេល៦ឆ្នាំ ដោយមានក្រសួងសេដ្ឋកិច្ចនិងហិរញ្ញវត្ថុ ជាតំណាងរាជរដ្ឋាភិបាលក្នុងការចុះកិច្ចព្រមព្រៀងជាមួយធនាគារពិភពលោក។
ពាក់ព័ន្ធនិងគ្រប់គ្រងសំរាម សំណល់រឹងនិងប្លាស្ទិកក្នុងភូមិសាស្ត្រខេត្តកំពង់ស្ពឺ ឯកឧត្តមបណ្ឌិត ជាម ចន្ទ័សោភ័ណ អភិបាលខេត្តកំពង់ស្ពឺបានបញ្ជាក់ឱ្យដឹងថាខេត្តកំពង់ស្ពឺ បានក្លាយជាគោលដៅវិនិយោគឈានមុខគេនៅកម្ពុជា ដោយទទួលបានចំនួនគម្រោងខ្ពស់បំផុតក្នុងឆ្នាំ ២០២៤កន្លងទៅ។ ក្នុងចំណោមគម្រោងវិនិយោគសរុបចំនួន៤១៤ ដែលត្រូវបានអនុម័តទូទាំងប្រទេស ខេត្តកំពង់ស្ពឺបានទាក់ទាញគម្រោងចំនួន៩៣ ដែលឈរនៅលំដាប់កំពូល និងបង្ហាញពីសារៈសំខាន់សេដ្ឋកិច្ចដែលកំពុងកើនឡើង។ជាមួយនោះដោយចក្ខុវិស័យនិងកិច្ចខិតខំប្រឹងប្រែងរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ក្នុងការបង្កើតបរិយាកាសអំណោយផលសម្រាប់អ្នកវិនិយោគទាំងក្នុងស្រុក និងក្រៅស្រុក ដែលជាវិធីសាស្ត្រ«ទាក់ម៉ូយវិនិយោគ» របស់សម្តេចបានធ្វើឱ្យខេត្តកំពង់ស្ពឺក្លាយជាបណ្តុំរោងចក្រសហគ្រាសដែលគិតមកដល់បច្ចុប្បន្នខេត្តនេះមានរោងចក្រសហគ្រាសប្រមាណ១៣៩២កន្លែងនិងមានកម្មករ កម្មការិនីជិត២៥ម៉ឺនកំពុងបម្រើការ ដែលចំនួននេះក៏បាននិងកំពុងធ្វើឱ្យខេត្តកំពង់ស្ពឺប្រឈមនិងផលប៉ះពាល់ធ្ងន់ធ្ងរពីការអភិវឌ្ឍន៍នេះផងដែរ។ដើម្បីដោះស្រាយកង្វល់ខាងលើ រដ្ឋបាលខេត្តក៏បានបម្រុងទុកដីប្រមាណ១៥ហិកតា សម្រាប់ជាទីលានចាក់សម្រាម។
