កំពង់ស្ពឺ៖ បន្ទាប់ពីស្ដាប់របាយការណ៍ស្ដីអំពីលទ្ធផលការងាររបស់រដ្ឋបាលខេត្ត និងមន្ទីរជំនាញ សាធារណៈការ និងដឹកជញ្ជូនខេត្តឆ្នាំ២០២៤ គ្រោះថ្នាក់ចរាចរណ៍បានកើនឡើងដោយកត្តាមនុស្សជាពិសេសអ្នកបើកបររថយន្ត ដឹកកម្មករកម្មការិនីទៅបំពេញការងារនៅតាមគោលដៅរោងចក្រសហគ្រាសនីមួយៗ ដោយមានការធ្វេសប្រហែស មិនគោរពច្បាប់ចរាចរណ៍ផ្លូវគោក វ៉ាជែងក្នុងស្ថានភាពគ្រោះថ្នាក់ ទើបបណ្ដាលឱ្យមានគ្រោះថ្នាក់កើតឡើងជាយថាហេតុ។
ឯកឧត្តម ហ៊ឹម យ៉ាន រដ្ឋលេខាធិការក្រសួងមហាផ្ទៃ បានកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់គណៈបញ្ជាការឯកភាពខេត្ត ជាពិសេសមន្ទីរសាធារណការ និងដឹកជញ្ជូនខេត្ត ដែលបានខិតខំបំពេញតួនាទីភារកិច្ចកន្លងមក។ ហើយឯកឧត្តមមានប្រសាសន៍ និងណែនាំ ដើម្បីគោរពឱ្យបាននូវច្បាប់ចរាចរណ៍ និងបញ្ជៀសនូវគ្រោះថ្នាក់ចរាចរណ៍សូមឱ្យអាជ្ញាធរគ្រប់លំដាប់ថ្នាក់ពិសេសអធិការក្រុង-ស្រុក និងមន្ត្រីពាក់ព័ន្ធចុះផ្សព្វផ្សាយឱ្យបានទូលំទូលាយដល់មូលដ្ឋាន និងទីប្រជុំជន ជាពិសេសសាលារៀន ដើម្បីយល់ដឹង ក្នុងការកាត់បន្ថយគ្រោះថ្នាក់ចរាចរណ៍ សូមឱ្យប្អូនៗសិស្សានុសិស្សទាំងអស់គោរពឱ្យបាននូវច្បាប់ចរាចរណ៍បើកបរដោយពាក់មួកសុវត្ថិភាពឱ្យបានគ្រប់ៗគ្នា នូវស្លាកសញ្ញា ហើយបើកបរ មិនក្រោមជាតិស្រវឹង និងបើកបរមិនឱ្យលើសល្បឿនកំណត់។
ឯកឧត្តមបានបន្តថា៖ ដោយឡែកចំពោះមធ្យោបាយធុនធ្ងន់ដែលមានការកែច្នៃខុសលក្ខណៈបច្ចេកទេសសមត្ថកិច្ចចរាចរណ៍តាមដងផ្លូវ ឬអាជ្ញាធរភូមិ ឃុំ សង្កាត់ ត្រូវធ្វើការណែនាំឱ្យគោរពទៅតាមច្បាប់ចរាចរណ៍ផ្លូវគោក នៃព្រះរាជាណាចក្រកម្ពុជា ជៀសវាងគ្រោះថ្នាក់ជាយថាហេតុផ្លូវថ្នល់មិនមែនជាឧបសគ្គសម្រាប់យើងទាំងអស់គ្នានោះទេ គឺកត្តាមនុស្សជាអ្នកបង្ក ដូច្នេះយើងទាំងអស់គ្នាត្រូវជួយជំរុញការផ្សព្វផ្សាយឱ្យបានទូលំទូលាយ បើកបរដោយការប្រុងប្រយ័ត្ន ទើបជីវិតយើង និងគ្រួសារមានសុភមង្គលល្អ និងកាត់បន្ថយការចំណាយទៅលើការព្យាបាល នៃគ្រោះថ្នាក់ចរាចរណ៍ និងក្រុមគ្រួសារមានជីវភាពធូរធារ។
ដោយឡែកចំពោះសមត្ថកិច្ចចរាចរណ៍ ដែលបានឃាត់រក្សាទុកនូវរថយន្តដែលដឹកលើសទម្ងន់ ឬកែច្នៃខុសលក្ខណៈបច្ចេកទេស សូមជួយសម្របសម្រួល ជាមួយចៅក្រម ព្រះរាជអាជ្ញាសាលាដំបូង និងរៀបចំឯកសារ ឱ្យបានត្រឹមត្រូវដើម្បីដោះលែង ជៀសវាងការថ្នាំង ថ្នាក់ពីប្រជាពលរដ្ឋ ដែលកំពុងប្រកបមុខរបរប្រចាំថ្ងៃ។
គួរបញ្ជាក់ផងដែរថាថ្ងៃទី២០ ខែវិច្ឆិកា ឆ្នាំ២០២៤ រដ្ឋបាលខេត្តកំពង់ស្ពឺបើកកិច្ចប្រជុំត្រួតពិនិត្យសុវត្ថិភាពចរាចរណ៍ផ្លូវគោក ក្រោមអធិបតីភាពឯកឧត្តម ហ៊ឹម យ៉ាន រដ្ឋលេខាធិការក្រសួងមហាផ្ទៃ និងជាអគ្គលេខាធិការរង គ.ស.ច.គ និងឯកឧត្តម ហន ភក្តី អភិបាលរង ខេត្ត តំណាងឯកឧត្តមបណ្ឌិត ជាម ច័ន្ទសោភ័ណ អភិបាល នៃគណៈអភិបាលខេត្តកំពង់ស្ពឺ ក្នុងកិច្ចប្រជុំនេះដែរមានវត្តមាន លោកចៅក្រមសាលាដំបូងខេត្ត លោកស្នងការរងនគរបាលខេត្ត លោក លោកស្រីតំណាងមន្ទីរអង្គភាពជំនាញពាក់ ព័ន្ធ លោកអភិបាល អភិបាលរងក្រុង-ស្រុក លោកអធិការ អធិការរងក្រុង-ស្រុក ចូលរួមជាច្រើននាក់ទៀតផងដែរ៕
