បាត់ដំបង! បុរសជាតៃកុងម្នាក់រងរបួសធ្ងន់ ក្រោយបើករថយន្តដឹកដីឆ្លងថ្នល់ខ្វះការប្រុងប្រយ័ត្នត្រូវបានរថភ្លើងបុកពេញទំហឹងអោយក្រឡាប់ផ្ងាជើងនៅវេលាម៉ោង ១៥និង៣០នាទី ថ្ងៃទី១ ខែកុម្ភៈ ឆ្នាំ២០២៤ នៅត្រង់ចំណុចផ្លូវឆ្លងទី២ ស្ថិតក្នុងភូមិស្វាយជាតិ ឃុំរាំងកេសី ស្រុកសង្កែ ខេត្តបាត់ដំបង។
ប្រភពនៅកន្លែងកើតហេតុបានប្រាប់ថា នៅមុនពេលកើតហេតុគេឃើញរថយន្តកូរ៉េដឹកដីពណ៌សមួយគ្រឿង ពាក់ផ្លាក BB-0311បើកបរដោយបុរសឈ្មោះ ដុង ឧត្តម រស់នៅភូមិរាំងក្រោល ឃុំរាំងកេសី ស្រុកសង្កែ ខេត្តបាត់ដំបង ក្នុងទិសដៅពីលិចទៅកើត ហើយបានបើកឆ្លងថ្នល់ដោយខ្វះការប្រុងប្រយ័ត្ន ភ្លាមនោះក៏ស្រាប់តែមានរថភ្លើងដឹកអ្នកដំណើរមួយគ្រឿង បើកបរដោយបុរសម្នាក់ក្នុងទិសដៅពីជើងទៅត្បូង ជ្រុលមកបុកពេញទំហឹងបណ្តាលអោយក្រឡាប់ផ្ងាជើងរងការខូចខាតយ៉ាងដំណំ ចំណែកតៃកុងរងរបួសធ្ងន់។
ក្រោយពេលកើតហេតុ ជនរងគ្រោះត្រូវបានសាច់ញាតិដឹកបញ្ជូនទៅសង្គ្រោះព្យាបាលនៅមន្ទីរពេទ្យ ចំណែកមធ្យោបាយទាំងពីរ សមត្ថកិច្ចជំនាញចុះធ្វើកំណត់ហេតុដើម្បីចាត់ការតាមនីតិវិធីច្បាប់។
