កំពង់ស្ពឺ៖ រសៀលថ្ងៃទី ១៧ ខែ មករា ឆ្នាំ ២០២៤ សាខាកាកបាទក្រហមកម្ពុជា ខេត្តកំពង់ស្ពឺ ឯកឧត្តម វ៉ី សំណាង ប្រធានគណៈកម្មាធិការសាខា បានដឹកនាំកិច្ចប្រជុំបូកសរុបលទ្ធផលការងារប្រចាំឆ្នាំ ២០២៣ និងលើកទិសដៅសម្រាប់ឆ្នាំ ២០២៤ ក្នុងពិធីនេះដែរក៏មានការអញ្ជើញចូលរួមពី ឯកឧត្តម លោកជំទាវ គណៈកម្មាធិការសាខា លោក លោកស្រី ប្រធាន អនុប្រធានគណៈកម្មាធិការអនុសាខា ក្រុង ស្រុកទាំង ៩ ក្រុមប្រតិបត្តិសាខាសរុបចំនួន ២៧នាក់ នៅសាលប្រជុំ កង ហ៊ាងសាលាខេត្តកំពង់ស្ពឺថ្មី ។
គោលបំណងនៃកិច្ចប្រជុំនេះគឺ ដើម្បីបូកសរុបលទ្ធផលការងារដែលសម្រេចបានក្នុងឆ្នាំ ២០២៣ ក៍ដូចជាបញ្ហាប្រឈមនានាដែលសាខា អនុសាខាជួបប្រទះ និងធ្វើការដោះស្រាយនូវសំណូមពរមួយចំនួនដែលមាននៅថ្នាក់សាខា និងអនុសាខា ។
តាមរបៀបវារៈដែលបានគ្រោងទុក ឯកឧត្តម វ៉ី សំណាង បានមានប្រសាសន៍បើកកិច្ចប្រជុំ ដោយសំដែងនូវការកោតសរសើរចំពោះការខិតខំប្រឹងប្រែងយកអស់ពីកម្លាំងកាយចិត្តប្រាជ្ញា ស្មារតីទទួលខុសត្រូវចូលរួមយ៉ាងសកម្មក្នុងការបំពេញបេសកកម្មមនុស្សធម៌របស់ឯកឧត្តម លោកជំទាវ លោក លោកស្រី ទាំងគណៈកិត្តិយសសាខា គណៈកម្មាធិការសាខា ក្រុមប្រតិបត្តិសាខា អនុសាខាក្រុង-ស្រុក ក្រុមកាកបាទក្រហមឃុំសង្កាត់ អាជ្ញាធរគ្រប់លំដាប់ថ្នាក់ បានរួមគ្នាដោះស្រាយឆ្លើយតបដល់ប្រជាជនរងគ្រោះ និងងាយរងគ្រោះមហន្តរាយបំផុត និងការងារសង្គមជាច្រើនទៀត ទទួលបានកាន់តែប្រសើរថែមទៀត ដោយមិនគិតពេលវេលាឡើយ ។ហើយសូមឯកឧត្តម លោកជំទាវ លោក លោកស្រី គណៈកម្មាធិការសាខា និងអនុសាខាក្រុង ស្រុក យកចិត្តទុកដាក់តាមដានស្តាប់សេចក្តីព្រាងរបាយការណ៍បូកសរុបលទ្ធផលការងារប្រចាំឆ្នាំ ២០២៣ និងលើកទិសដៅសម្រាប់ឆ្នាំ ២០២៤ ដែលអានដោយលោកស្រី អោម ចន្នា នាយិកាសាខា ។
ចុងបញ្ចប់ឯកឧត្តម វ៉ី សំណាង ប្រធានគណៈកម្មាធិការសាខា មានប្រសាសន៍បូកសរុបក្នុងអង្គប្រជុំ និងក្រោយពីបានស្តាប់ការពិភាក្សា មតិយោបល់ និងអនុម័តទៅលើសេចក្តីព្រាងរបាយការណ៍សកម្មភាព របាយការណ៍ហិរញ្ញវត្ថុ និងទិសដៅអនុវត្តបន្ត ។
