(បាត់ដំបង) កម្លាំងគណៈបញ្ជាការឯកភាពស្រុកឯកភ្នំ ដែលដឹកនាំដោយលោក ម៉ិល សុផល អភិបាលស្រុក និងជាប្រធានគណៈបញ្ជាការឯកភាពរដ្ឋបាលស្រុក បានសហការជាមួយកម្លាំងនៃស្នងការដ្ឋាននគរបាលខេត្ត កម្លាំងកងរាជអាវុធខេត្ត កម្លាំងភូមិភាគ៥ កម្លាំងសឹករងខេត្ត កម្លាំងស៊ើបការមណ្ឌល៥ កម្លាំងបរិស្ថាន កម្លាំងជលផល និងកម្លាំងសហគមន៍នេសាទ បានបន្តចុះបង្ក្រាបបទល្មើសធនធានធម្មជាតិ ក្នុងភូមិសាស្ត្រ (អតីតឡូត៍នេសាទលេខ២) ។
កិច្ចប្រតិបត្តិការខាងលើនេះធ្វើឡើងកាលពីព្រឹកថ្ងៃទី១៤ ខែមករា ឆ្នាំ២០២៤ ក្នុងភូមិសាស្ត្រ (អតីតឡូត៍នេសាទលេខ២) នៅចំណុចតំបន់រ៉ាមសារព្រែកទាល់ ស្ថិតក្នុងឃុំកោះជីវាំង ស្រុកឯកភ្នំ ខេត្តបាត់ដំបង ដោយប្រើប្រាស់កម្លាំងសរុបចំនួន ២៥នាក់ កាណូត ១០គ្រឿង និងបានកាប់បំផ្លាញសាច់មងប្រវែង ៥,២០០ម៉ែត្រ ,ឡុកចំនួន ១៥ឡុក ,បង្គោលបណរ៉ាវ ចំនួន ៨០០ដើម និងព្រលែងត្រីចម្រុះប្រមាណ ១០០គីឡូក្រាម ។
ជាមួយកិច្ចប្រតិបត្តិការខាងលើនេះដែរប្រជាពលរដ្ឋ ឈ្មោះ រ៉ើន បូ បានប្រគល់ ឧបករណ៍នេសាទខុសច្បាប់(អាំងវ៉ិចទ័រ)ចំនួន១គ្រឿង និងពលរដ្ឋផ្សេងទៀតសរុប ចំនួន ៣២នាក់ បានមកធ្វើកិច្ចសន្យាផ្តិចមេដៃ ដើម្បីបញ្ឈប់ដាក់បណរ៉ាវ ក្នុងដែនអភិរក្សអតីតឡូតិ៍លេខ ២ ក្នុងភូមិសាស្ត្រឃុំកោះជីវាំង ស្រុកឯកភ្នំផងដែរ។
