ក្រចេះ÷ នៅព្រឹកថ្ងៃសុក្រ ទី១៥ ខែសីហា ឆ្នាំ២០២៥ ឯកឧត្តម វ៉ា ថន អភិបាលខេត្តក្រចេះ និងជាប្រធានគណៈកម្មាធិការ សាខាកាកបាទក្រហមកម្ពុជាខេត្ត និងសហការី បាននាំយកអំណោយមនុស្សធម៌ ជាសម្ភារប្រើប្រាស់ គ្រឿងឧបភោគបរិភោគ និងថវិកា របស់សាខាខេត្តក្រចេះ ចែកជូនដល់គ្រួសាររងគ្រោះដោយទឹកជំនន់ ដែលបានជម្លៀសមករស់នៅតាមដងផ្លូវ ទីទួលនានាជាបណ្តោះអាសន្ន សរុបចំនួន ៤៦គ្រួសារ មកពីសង្កាត់ក្រចេះ ក្រុងក្រចេះ ដែលពិធីនេះធ្វើឡើងនៅបរិវេណអនុសាខាកាកបាទក្រហមកម្ពុជា ក្រុងក្រចេះ ។
មានប្រសាសន៍ក្នុងឱកាសនោះដែរ ឯកឧត្តម បានពាំនាំនូវប្រសាសន៍ផ្ដាំផ្ញើសួរសុខទុក្ខ និងក្ដីស្រឡាញ់នឹករលឹកយ៉ាងជ្រាលជ្រៅបំផុត ពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនដល់បងប្អូនប្រជាពលរដ្ឋរងគ្រោះនៅពេលនេះ ដែលជានិច្ចកាល សម្តេច តែងតែគិតគូរជានិច្ចអំពីសុខទុក្ខរបស់ប្រជាពលរដ្ឋទាំងអស់ ដោយមិនប្រកាន់ពូជសាសន៍ សាសនា ឬនិន្នាការនយោបាយអ្វីឡើយ ។
ទន្ទឹមនឹងនេះ ឯកឧត្តម ក៏បានផ្តាំផ្ញើដល់បងប្អូនប្រជាពលរដ្ឋទាំងអស់ ត្រូវមានការយកចិត្តទុកដាក់អំពីបញ្ហាសុខភាពឱ្យបានជាប់ប្រចាំ ត្រូវគេងក្នុងមុង ហូបទឹកស្អាត រឺទឹកដាំពុះ ហូបចំណីអាហារដែលមានអនាម័យល្អ និងសូមណែនាំកូនចៅកុំឱ្យលេងទឹក ជាពិសេសនៅរដូវមានទឹកជំនន់ ។
អំណោយដែលបានផ្តល់ជូនក្នុង១គ្រួសារទទួលបាន៖ អង្ករ២៥គីឡូក្រាម សារុង១ មុង១ ភួយ១ ក្រមា១ អាវយឺត៣ ម៉ាស់ក្រណាត់១០ មី១កេស ត្រីខ១០កំប៉ុង និងថវិកា ៥០.០០០រៀល ៕ ដោយលោក ម៉ែន បូរិទ្ធ
