ក្រចេះ÷ នាព្រឹកថ្ងៃអាទិត្យ ទី០៣ ខែសីហា ឆ្នាំ២០២៥ ឯកឧត្តម វ៉ា ថន អភិបាលខេត្តក្រចេះ ដឹកនាំមន្ត្រីរាជការ កងកម្លាំងប្រដាប់អាវុធ អញ្ជើញនាំយកគ្រឿងឧបភោគបរិភោគ សម្ភារនានា និងថវិកាចំនួន២៥០លានរៀន ដែលជាអំណោយរបស់ព្រះសង្ឃ រដ្ឋបាលខេត្ត ក្រុង-ស្រុក និងសប្បុរសជននានានៅក្នុងខេត្តក្រចេះ មកប្រគល់ជូនកងទ័ពជួរមុខប្រចាំទិសខេត្តឧត្តរមានជ័យ នៅតាមបន្ទាត់ព្រំដែន និងបងប្អូនជនភៀសសឹកទាំងអស់ ។
ឯកឧត្តម វ៉ា ថន អភិបាលខេត្តក្រចេះ មានប្រសាសន៍ថា រាជរដ្ឋាភិបាលក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងជាប្រធានព្រឹទ្ធសភា រហូតបន្តមក សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានតម្កល់សុខសន្តិភាព ស្ថិរភាព និងសេចក្តីសុខរបស់ប្រជាជនជាចម្បង និងមិនឱ្យប្រជាជនណាម្នាក់បាត់បង់ជីវិតដោយសារការខ្វះខាតស្បៀងឡើយ ទោះបីសភាពការណ៍តាមបន្ទាត់ព្រំដែនបានស្ងប់ស្ងាត់ក្តី ប៉ុន្តែក្នុងនាមរដ្ខបាលខេត្ត បានគោតសរសើរ នូវភាពអង់អាចក្លាហានរបស់កងទ័ពជួរមុខ ក្នុងការពារបូរណភាពទឹកដី ប្រឆាំងសត្រូវឈ្លានពានមកលើដែនអធិបតេយ្យភាពកម្ពុជា។
ឯកឧត្តម វ៉ា ថន អភិបាលខេត្តក្រចេះ បានពាំនាំការផ្ដាំផ្ញើសួរសុខទុក្ខ ពីសំណាក់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ជូនបងប្អូនកងទ័ព និងជនភៀសសឹកទាំងអស់ដោយក្តីនឹករលឹក និងសូមរក្សាភាពអត់ធ្មត់ស៊ូទ្រាំ និងថែរក្សាខ្លួននៅទីកន្លែងសុវត្ថិភាព ខណៈពេលដែលការចាកចេញពី គេហដ្ឋាន ភូមិស្រុក បងប្អូនគឺជាការលះបង់ចាំបាច់មួយ ដើម្បីបញ្ចៀសហានិភ័យ នៃការប្រយុទ្ធគ្នារវាងកងទ័ពនៃប្រទេសទាំងពីរ កម្ពុជា-ថៃ ដែលជួយសម្រួលឱ្យកងទ័ពរបស់យើង ការពារទឹកដីដោយទឹកចិត្តមោះមុត និងអង់អាចក្លាហាន ។
ឯកឧត្តម អភិបាលខេត្ត សូមថ្លែងអំណរគុណ និងគោរពដឹងគុណ ដល់វីរកងទ័ពជួរមុខកម្ពុជា ក្នុងការការពារបូរណភាពទឹកដី តាមខ្សែបន្ទាត់ព្រំដែន ប្រកបដោយភាពអង់អាចក្លាហាន និងឈរជើងយ៉ាងរឹងមាំ ប្រឆាំងនឹងសត្រូវឈ្លានពាន ហើយសូមឱ្យបងប្អូនពុកម៉ែប្រជាពលរដ្ឋ មានជំនឿចិត្តលើចំណាត់ការបស់រាជរដ្ឋាភិបាល ដែលតែងតែនៅជាមួយបងប្អូនប្រជាពលរដ្ឋគ្រប់កាលៈទេសៈ និងបញ្ចប់ជម្លោះ តាមរយៈកិច្ចចចារសម្របសម្រួលឱ្យមានបទឈប់បាញ់ រវាងកម្ពុជា-ថៃ ចាប់ពីថ្ងៃទី២៨ ឆ្លងចូលថ្ងៃទី២៩ ខែកក្កដាតទៅ ។ ឯកឧត្តម បន្ថែមថា តបតាមការអំពាវនាវរបស់រាជរដ្ឋាភិបាល សូមបងប្អូនប្រជាពលរដ្ឋចូលរួមគាំទ្រ សំដៅឈើលើស្មារតីសាមគ្គីជាតិ យន្តការការផ្សារភ្ជាប់រវាងសមរភូមិក្រោយជាមួយសមរភូមិមុខ ៕ ដោយលោក ម៉ែន បូរិទ្ធ
